«Манчестер Юнайтед» жамоасининг собиқ футболчиси, ирландиялик Рой Кин «Челси»нинг бельгиялик ярим ҳимоячиси Эден Азарнинг «ПСЖ»га ўтиши мумкинлиги ҳақидаги хабарларга муносабат билдирди.
«Мен бундай футболчиларни сира тушуна олмайман. Ўтган йили у жамоаси билан шартномасини 5 йилга узайтирди. Биз у кўрсатган ажойиб ўйинлар гувоҳи бўлдик. У ўтган мавсумда жамоасининг асосий футболчиси бўлганди. Энди эса («Челси»нинг ЕЧЛ нимчорак финалидаги «ПСЖ»га қарши ўйини олдидан - таҳририят изоҳи) парижликлардан таклиф тушса, рад қилиши қийинлигини айтиб ўтирибди.
У талтайиб кетган. Агар мен унинг жамоадошлари ўрнида бўлганимда машғулот вақтида орқасига тепиб майдонни айлантириб чиқардим. Жамоадаги тажрибали футболчилар унинг ақлини киритиб қўйиши керак.
Азар истеъдодли футболчи. Лекин унинг ишга муносабати ҳақида яхши фикр билдириш қийин. У қорни тўйиб қолган болага ўхшайди. Бу шунчаки кўрнамакликдир», – дейди Кин ITV телеканали эфирида.
