«Манчестер Юнайтед» раҳбарияти клуб ҳужумчиси Маркус Рашфордни 26 миллион фунт стерлинг миқдорида сотиб олиш ҳуқуқи билан «Барселона»га ижарага беришга розилик берганидан афсусда. Бу ҳақда Mirror нашри хабар берди.

Англиялик футболчи жорий мавсумда барча мусобақаларда 34 та учрашувда иштирок этиб, 10 та гол урди ва 13 та голли узатма амалга оширди. Манба маълумотига кўра, «қизил иблислар» раҳбарияти футболчининг трансфер қиймати камида 50 миллион фунт атрофида бўлиши керак, деб ҳисобламоқда.

Футболчининг ўзи эса каталонияликлар сафида қолишни истамоқда. Бу эса «кўк-анорранглилар» учун, агар улар англиялик ўйинчини тўлиқ сотиб олишга қарор қилса, устунлик бериши мумкин. Таъкидланишича, ижара шартномасида муддатидан олдин бекор қилиш имконияти кўзда тутилмаган.

«Манчестер Юнайтед» хўжайини Жим Рэтклифф Рашфордни клуб бюджетига тушаётган юкни камайтириш мақсадида сотишни истамоқда. Бироқ у футболчини «Барселона»га арзон нархда қўйиб юборишни хоҳламайди.