Пойтахтимизда футзал бўйича ўтказилаётган XIV Осиё чемпионатида бугун финалчилар номи маълум бўлади.

Финал йўлланмаси учун Ўзбекистон терма жамоаси таиландлик футзалчиларга қарши майдонга тушса (ўйин 16:00да бошланади), ўн карра Осиё чемпиони Эрон терма жамоаси Въетнам термаси билан куч синашади (19:00).

Эслатиб ўтамиз, Ўзбекистон терма жамоаси 2001, 2006 ва 2010 йиллари Осиё чемпионатининг финал баҳсида олтин медаллар учун кураш олиб борган.

Кеча эса Жаҳон чемпионатининг бешинчи йўлланмаси учун курашни давом эттираётган терма жамоалар ўртасида ўйинлар ўтказилди. Ироқ терма жамоаси австралияликларга 3:5 ҳисобида имкониятни бой берди. Қирғизистон термаси эса амалдаги Осиё чемпиони Япония терма жамоасини 6:2 ҳисобида мағлубиятга учратди.

Шу тариқа, Австралия ва Қирғизистон терма жамоалари бугун соат 16:00га белгиланган учрашувда Жаҳон чемпионатининг бешинчи йўлланмаси учун баҳс юритадилар.