Ўзбекистонда биринчи марта Олимпиада лицензиясини қўлга киритган спортчилар ва уларнинг мураббийлари учун мукофот татбиқ этилди. Бу ҳақда республика Олимпиада қўмитаси вакилига асосланган ҳолда Sputnik нашри хабар берган.

Манбанинг айтишича, спортчилар ва мураббийлар учун мўлжалланган мукофот қиймати 50-60 млн сўм атрофида. Олимпиадада ютиб олинган совринлар учун эса алоҳида мукофотлар берилиши айтилган.

“Биз спортчилар ва уларнинг мураббийлари учун, Бразилия олимпиадаси олдидан, биринчи марта бундай қўшимча рағбатлантирувчи омил киритдик. Шундай йўл билан биз ўз атлетикачиларимизни нафақат маънавий балки моддий йўл билан ҳам қўллаб-қувватламоқчимиз”, — деди Миллий Олимпиада қўмитаси вакили.

Олимпиадада олтин, кумуш ва бронза медаллар олган спортчилар учун бериладиган мукофотлар ҳам сақланиб қолган. Уларнинг аниқ миқдори, одатдагидек, олимпиададан бир ой олдин, президент қарори билан белгиланади. Одатга кўра, Олимпиада қўмитаси ҳам ғолиблар учун алоҳода мукофот белгилайди.

Ўзбекистон Рио-де-Жанейрода бўлиб ўтадиган олимпадага катта умид боғлаган. Лондонда бўлиб ўтган олимпиада ва паралимпиадага қараганда Ўзбекистон делегациясида спортчилар сони тўрт баравар ошиши кутилмоқда. Бўлажак олимпиада учун Ўзбекистон жамоаси юзга яқин йўлланмани қўлга киритишни режалаштирган.

Қўмита бу борада сузувчилар, дзюдочилар, гимнастикачиларга катта умид боғламоқда. Бугунги кунгача Ўзбекистон спортчилари ихтиёрида 30та йўлланма бор.

2016 йилги ёзги олимпиада ўйинлари 5–21 август кунлари давомида, Бразилиянинг йирик шаҳарларидан бири Рио-де-Жанейрода бўлиб ўтади. Мусобақалар Бразилиянинг Белу-Оризонти, Бразилиа, Салвадоре ва Сан-Паулу шаҳарларида ҳам бўлиб ўтиши режалаштирилган.

Бу Жанубий Америкада бўлиб ўтадиган илк олимпиада ўйинларидир. Лотин Америкасида 1968 йили Мехико шаҳрида Олимпиада ўйинлари бўлиб ўтганди.

Рио олимпиадасида 306та медаллар шодаси учун, 206 мамлакатдан келган спортчилар баҳс олиб боришади.