Франция профессионал футбол лигаси директорлари кенгаши мамлакат Суперкубогининг навбатдаги учрашувини Австрияда ўтказадиган бўлди. Бу ҳақда Le Figaro нашри хабар бермоқда.
Учрашув жорий йилнинг 6 август куни Клагенфуртдаги "Хипо-Арена" стадионида бўлиб ўтади. Стадион ўз бағрига 32 минг мухлисни сиғдира олади.
Айни вақтда чемпионлик масаласи амалда ҳал бўлган. "ПСЖ" 27 турдан кейин 74 очко билан биринчи ўринда бормоқда. Иккинчи ўриндаги "Монако" эса парижликлардан 24 очко ортда қолиб кетган.
Ҳозирга келиб, Франция кубогининг чорак финалига чиққан 8 жамоа номи маълум бўлган. 2-3 март кунлари "Лорьян"-"Газелек Аяччо", "Сошо"-"Нант", "Сент-Этьен"-"ПСЖ" ҳамда "Гранвиль"-"Марсель" жамоалари ўз ўйинларини ўтказишади.
Агар чемпионлик ва кубок ғолиблиги "ПСЖ"га насиб этса, Суперкубок ўйини чемпион ва кубок финалига чиққан жамоа ўртасида ўтказилади.
Ўтган йили кубокни "ПСЖ" жамоаси қўлга киритганди.
Эслатиб ўтамиз, Франция Суперкубогининг олдинги учрашуви Канаданинг Монреал шаҳрида бўлиб ўтган.
