Ўйиндан сўнг «Ал-Иттиҳод» жамоасининг юлдуз футболчиси Салли Мунтарини ҳам суҳбатга тортдик. Ганалик футболчи баҳс ҳақидаги фикрлари билан ўртоқлашди.
- Бугунги учрашув ҳақида фикрингиз қандай?
- Ўйиннинг осон кечмаслиги олдиндан маълум эди. «Локомотив» - яхши шаклланган жамоа. Ярим ҳимояси жуда ҳам кучли. Буни жамоани ўрганиш жараёнида билган эдик. Сўнгги дақиқада гол ўтказиб юборганимиз алам қилди. Унгача ҳаммаси бизнинг режа асосида кетаётганди. Афсуски, жароҳатим безовта қилиб қолди ва бунинг натижасида майдонни эрта тарк этишимга тўғри келди. Шундай бўлсада, бир очкони қўлга киритганимиздан хурсандмиз. Меҳмондан, боз устига, асосий рақиб жамоа майдонидан очко билан қайтиш - яхши натижа.
- Бугун «Ал-Иттиҳод» икки очко йўқотдими ёки бир очкога эга бўлдими?
- Меҳмонда ўйнаганимизни инобатга олсак, бир очкога эга бўлдик. Сўнгги дақиқада ўтказиб юборган голимиздан келиб чиқиб гапирсам, икки очко йўқотдик, деб ўйлайман.
- «Локомотив»дан ташқари, ОЧЛда қатнашаётган яна учта жамоамиз ҳақида нима дея оласиз?
- Батафсил маълумотга эга эмасман. Лекин бу номларни аввал ҳам эшитганман, қаердадир ўқиганман.
- Ўз вақтида Италиянинг «Милан» клубида тўп сургансиз. Айни пайтда эса Осиёда ўйнаяпсиз. Икки қитъа футболи орасидаги тафовутлар нималарда акс этяпти?
- Жуда ҳам катта фарқ йўқ. Барча қитъаларда футболнинг қонун-қоидаси бир хил. Тўғри, Европада футбол санъат даражасига кўтарилган. Мухлислар стадионга спектакль томоша қилиш учун келишади. Осиёда эса бироз бошқачароқ экан. Лекин сўнгги йилларда «сариқ қитъа» футболида ҳам сезиларли ўсиш кўзга ташланяпти. Фикримга биргина Хитой клублари мисол бўла олса керак.
Камолиддин АЛИМОВ суҳбатлашди, "ИнтерФУТБОЛ" газетаси (26 февраь кунги пайшанба сонидан)
