Россиялик миллиардер, Лондоннинг "Арсенал" жамоаси акционерларидан бири Алишер Усмонов ўзининг жамоа акцияларининг 30 фоизига эгалик қила бошлагани ҳақидаги хабарларни тасдиқлади ва жамоага "узоқ муддатли инвестиция" киритишни мўлжаллаётгани ҳақида айтиб ўтди.
Усмонов "канонирлар" жамоаси акционерларидан бири бўлган, Red & White Holdings Limited компанияси раҳбари Фарҳод Маширийдан акцияларни сотиб олганини тасдиқлаган. Эндиликда у Red & White компаниясининг 100 фоизлик акцияларига эгалик қилади. Унинг Arsenal Holdings PLC ҳолдингидаги улуши 14,58 фоиздан 30,04 фоизга ортган.
Усмонов 2007 йилда "Арсенал"нинг 14,58 фоиз акцияларини сотиб олган эди.
"Мен эндиликда Фарҳод Маширийнинг акциялар пакетини сотиб олдим ва "Арсенал"даги улушимни 30 фоизга оширдим. Лекин бу Англиядаги бошқа жамоанинг катта миқдордаги акцияларига эгалик қилишимга халал бермайди", дея Усмоновнинг сўзларидан иқтибос келтиради The Telegraph.
Бундан олдинроқ, Алишер Усмонов "Эвертон" жамоасининг янги эгасига айлангани ҳақида хабар пайдо бўлганди. Лекин бу маълумот кейинроқ инкор қилинди.
