Ёшлар (U19) ўртасидаги УЕФА лигаси 1/8 финал босқичи доирасида "Валенсия" ва "Челси" жамоалари ўртасидаги ўйиндан кейин амалга оширилган пенальтилар серияси қайтадан тепилиши мумкин.

Гап шундаки, учрашувнинг асосий вақти 1:1 ҳисобидаги дуранг билан якунланди ва жамоалар пенальтилар сериясини бошлашди. Ҳакам испанияликлар 11 метрли зарбадан урган битта голини инобатга олмади. Альберто Хилнинг зарбасидан кейин тўп чизиқни кесиб ўтиб, дарвоза ичидаги кичик темирга тегиб, ортга қайтиб чиқди. Ҳакам Адриен Жаккотте ушбу зарбани гол бўлмади деб ҳисоблади. Натижада «Челси» пенальтилар серияси ғалаба қозонди (5:4).

"Валенсия" клуби УЕФА шикоят хати ёзиб, ҳакам инобатга олмаган зарба аслида гол бўлганини исботловчи видеоёзувни тақдим этди.

Шу боис, УЕФА ёшлар ўртасидаги ЕЧЛнинг чорак финалнинг барча ўйинларини 7-8 март кунларига, «Челси» ва «Аякс» ўртасидаги учрашувни 14-15 мартга белгилади. Бу вақтгача ташкилот муаммоли ўйинни ўрганиб чиқиб, қарор чиқаришга улгуради.