“Ал-Иттиҳод” – “Локомотив” ўйинолди матбуот анжуманида иштирок этган “темирйўлчилар” бош мураббийи Андрей Микляев унинг шогирдлари рақибдан қўрқмасликлари ҳақида айтиб ўтди.

“Рақибни ҳурмат қиламиз, бироқ бу қўрқиш дегани эмас. Беллашувда “Ал-Иттиҳод”га қарши муносиб ўйин кўрсатиб, энг камида мағлуб бўлмасдан қайтиб кетмоқчимиз. Биласизки, Тошкентдаги ўйинда ғолибни аниқлаб бўлмаганди”, – дейди Микляев.

Мураббийнинг сўзларига кўра ўйин арафасида Темурхўжа Абдухолиқов бироз шамоллаб қолган. Бироқ шамоллаш жиддий эмаслиги сабабли, бу ҳужумчининг майдонга тушишига катта эҳтимол билан халал қилмайди. Икром Алибоев эса аксинча – биринчи ўйиндагидан фарқли ўлароқ сафга қайтган. Учрашув арафасидаги ягона савол Сервер Жепаров билан боғлиқ. Шифокорлар назоратида бўлиб турган тажрибали футболчининг майдонга тушиши юз фоизга аниқ эмас.

Маҳаллий журналистлар “Қирол Абдулоҳ” стадионининг анчагина катта экани ва мухлислар билан тўлиб-тошганида рақибга яхшигина босим бўлишини эслатиб ўтишди.

“Биз чемпионлар лигасида биринчи бор ўйнаётганимиз йўқ. Қолаверса, сафимиздаги бир қатор футболчилар бундан ҳам катта ареналарда ўйнаб, тажриба тўплашган”, – деб фикр билдирди Андрей Микляев.

Мураббий билан биргаликда матбуот анжуманига ташриф буюрган Олег Зотеев унинг шериклари ўйинга тайёр эканликларини маълум қилди:

“Ал-Иттиҳод” шонли тарихга эга жамоа. Биз эса ўз тарихимизни ёзишга уриняпмиз. Эртага ўзимизни кўрсатиш учун қўлимиздан келганини қиламиз, жамоадошларим бунга тайёр”, – дейди Олег Зотеев.