Испания чемпионатининг 28-тури доирасида "Реал" ўз майдонида "Сельта"ни қабул қилди ва ўта йирик ҳисобда (7:1) ғалаба қозонди.
Биринчи бўлимдаги ўйинга қараб, ҳисобнинг бундай йирик кўриниш олишини тахмин қилиш қийин эди. Танаффусга қадар виголиклар мезбонларга жиддий қаршилик кўрсатишди. Ҳаттоки голга тортадиган ўта хавфли вазиятни улар яратишди. 14-дақиқада қанотдан етказилган узатмани Аспас бош билан дарвоза томон бурди. Тўп тўсинга тегиб, Ягонинг ўзига келиб тушдли. Унинг 4 метрдан йўллаган зарбасини Навас оёқ билан қайтариб қолди.
Орадан кўп ўтмасдан Иско яқин масофадан дарвозани ишғол қила олмади. Унинг зарбасини Рубен Бланко қайтаришга муваффақ бўлди. Бўлим сўнгида Пепе бурчакдан етказилган узатмага бош билан зарба бериб, ҳисобни очди.
Иккинчи бўлимда эса ўйин суръати бутунлай ўзгариб кетди. Айниқса, Роналдунинг дастлабки иккита голи "Сельта"ни бутунлай "синдирди". Криштиану ўйиндан ва жарима зарбасидан бир-бирига ўхшаш 2та гол урди. Удан кейин эса португалиялик футболчи бўш дарвозани ишғол қилган бўлса, ўзининг тўртинчи голини бош билан киритди. Мазкур "покер" натижасида Роналду 27та гол билан Ла лига тўпурарлари баҳсида пешқадам бўлиб олди.
Шунингдек, захирадан майдонга тушган Хесе ва Бэйл ўз номини таблога ёздириб қўйишга муваффақ бўлишди.
Ла лига, 28-тур
Реал Мадрид – Сельта 7:1 (1:0, 6:1)
Голлар: 1:0 – 41 Пепе, 2:0 – 50 Роналду, 3:0 – 58 Роналду, 3:1 – 62 Аспас, 4:1 – 64 Роналду, 5:1 – 76 Роналду, 6:1 – 77 Хесе, 7:1 – 81 Бэйл.
Реал Мадрид – Навас, Рамос, Карвахаль (Марсело, 77), Данило, Пепе, Ковачич, Каземиро, Иско (Бэйл, 65), Васкес, Роналду, Майораль (Хесе, 70).
Сельта – Бланко, Мальо, Планас, Кастро, Гомес, Васс (Бовю, 77), Диас, Эрнандес (Радоя, 35), Орельяна, Нолито, Аспас (Гвидетти, 67).
Огоҳлантиришлар: Данило (25), Пепе (29), Нолито (40), Кастро (59), Орельяна (85).