Футбол бўйича Ўзбекистон миллий чемпионатида куни кеча янги мавсум старт олди.

1-тур доирасида кечган қизиқарли баҳслардан бирида Тошкентнинг “Локомотив” жамоаси Наманганда “Навбаҳор” меҳмони бўлди. Жами дарвозалар 5 марта ишғол қилинган ушбу ўйинда “темирйўлчилар” 3:2 ҳисобида ғалабага эришишди.

“Локомотив” сафида маҳоратли ярим ҳимоячи Сардор Мирзаев дубль қайд этиб, жамоаси муваффақиятига муносиб хисса қўша олди. Футболчи SPORTS.uz интернет-порталига ушбу учрашув борасидаги таассуротларини бўлишди.

- Мавсумни ғалаба билан бошлаб олганимиз жуда соз иш бўлди. “Навбаҳор”га қарши баҳслар доим ҳам қийин ўтиб келган. Айниқса, Наманганда ҳар қандай жамоа жиддий қаршиликка дуч келиши тайин. Кечаги ўйинда ҳам шундай бўлди. “Навбаҳор” ўз уйида фақат ғалаба қозониш учун ўйнади. Қолаверса, стадионга ташриф буюрган кўп сонли ишқибзолар ҳам мезбонларни қўллаб-қувватлаб туришди. Лекин бизнинг жамоа ҳам майдонга фақат 3 очко илинжида чиққанди. Шу сабабли йигитлар бор куч-ғайратни ишга солган ҳолда майдонда ҳаракат қилишди. Якунда биз ажойиб ғалабани расмийлаштирдик.

Учрашувда иккита тўп киритганимдан хурсандман. Лекин асосийси жамоамизнинг ғалабаси, голни ким уришини эса унчалик ҳам аҳамияти йўқ, - дейди Сардор Мирзаев.