Илгарироқ хабар берганимиздек, Швейцариянинг Цюрих шаҳрида бўлиб ўтган ФИФАнинг навбатдан ташқари Конгрессида Ўзбекистон Футбол Федерацияси бош котиби Сардор Раҳматуллаев ҳамда Қозоғистон Футбол Федерацияси бош котиби Азамат Айтхожин ўртасида учрашув бўлиб ўтганди ва унда ўзаро ҳамкорлик борасида келишувга эришилганди.

Унга биноан бугун Равшан Эрматов бошчилигидаги ҳакамлар гуруҳи Қозоғистон Суперкубоги учун ўйинни бошқариб боришади.

Шунингдек, мазкур лойиҳага кўра, ташриф давомида Равшан Эрматов Остана шаҳрида қозоғистонлик ёш реферилар учун семинар ҳам ўтказди. Унда машҳур рефери ўз ёрдамчилари – Абдуҳамидулло Расулов ва Жахонгир Саидовлар билан қозоқ ҳакамларига ўз тажрибалари билан бўлишди.