"Реал" чемпионлар лигасининг нимчорак финалида "Рома"ни мағлуб этиб, чорак финалга чиқди. Жавоб ўйинида Криштиану Роналду битта голга муаллифлик қилди ва мусобақадаги ўз голларини 90тага етказди. Шунингдек, португалиялик футболчи ЕЧЛ плей-офф босқичида 57та ўйин ўтказиб, рекорд натижа қайд этди.

"Ўйиндан қониқиш ҳосил қилдим. Олдимизга қўйилган вазифани бажардик ва чорак финалга чиқдик. Жамоа яхши ўйнади, иккита гол урдик. Барчамиз хурсандмиз.

Ўйин оғир бўлишини билардик. "Рома"да имкониятлар юзага келади ва улар дарвозамизни ишғол қилиши мумкин эди. Лекин ўзимиз ҳам кўп вазиятларни яратдик. Биринчи бўлим тенгкурашлар остида кечди. Танаффусдан кейин "Реал" яхшироқ ўйнади ва иккита муҳим гол урди.

Мавсум бошидан буён Кейлор Навас муҳим вазифани бажармоқда. Назаримда, у жамоанинг энг яхши ўйинчиларидан бири ва юқори савиядаги дарвозабон. У жуда яхши ўйнамоқда, унга юқори баҳо бераман.

Кейинги босқичда бизга ким тушишининг аҳамияти йўқ. Шунчаки кутамиз ва кейинги рақибимизни билиб оламиз. Чемпионлар лигаси якунигача ҳали олис масофа бор. Чорак финал ва ярим финал янада оғирроқ бўлади, лекин жамоа бунга тайёр", - дейди Роналду УЕФА расмий сайтига берган интервьюсида.