11 март куни Ўзбекистон XXVмиллий чемпионати олий лига жамоалари иккинчи тур учрашувларини бошлашади.
Тақвимга кўра, шу куни «Пахтакор» (Тошкент) – «Қўқон-1912» (Қўқон), «Андижон» (Андижон) – «Локомотив» (Тошкент), «Олмалиқ» (Олмалиқ) – «Насаф» (Қарши), «Машъал» (Муборак) – «Металлург» (Бекобод), «Сўғдиёна» (Жиззах) – «Бунёдкор» (Тошкент) жамоалари майдонга тушади.
Мазкур турдан жой олган яна уч учрашув эса 12 март куни ўтказилиши кўзда тутилган. Унда «Обод» (Тошкент) – «Бухоро» (Бухоро), «Шўртан» (Ғузор) – «Қизилқум» (Навоий), «Нефтчи» (Фарғона) – «Навбаҳор» (Наманган) жуфтликлари ўзаро баҳс юритишади.
Дастлабки турда муваффақиятли тўп сурган Ҳамиджон Актамов раҳбарлигидаги “Қизилқум” футболчилари бу гал Ғузорда “Шўртан” жамоаси меҳмони бўлади. Ушбу учрашувни пойтахтлик Виктор Серазетдинов бошқариб боради. Унга лайнсменлар бухоролик Бобур Қодиров ҳамда Абдураҳмон Қўлдошевлар кўмаклашадилар.
Ёшлар лигаси учрашуви бош ҳаками ва асосий таркиблар ўйини захира ҳаками этиб, Исхоқ Ибрагимов (Нукус)тайинланган.
Учрашувларни бухоролик Иброҳим Шарипов назорат қилиб боради.
Ўзбекистон Профессионал футбол лигаси вакили Алексей Фролов комиссар сифатида Ғузор шаҳрига ташриф буюради.
Эслатиб ўтамиз, ёшлар лигаси доирасида учрашув 11 март куни соат 14.00 да бошланади. “Шўртан” — “Қизилқум” жамоалари асосий таркиблари ўртасидаги ўйин эса 12 март куни соат 16.30 да старт олади.
