Хабарингиз бор, 16 март куни Қаршининг "Насаф" жамоаси Осиё чемпионлар лигаси гуруҳ баҳслари доирасида Қатарда "Ал-Жаиш" жамоасига қарши майдонга чиқади. Қаршиликларнинг ушбу  ўйини биз ўзбек футболи ишқибозлари учун икки карра аҳамиятли ўйини ҳисобланади. Сабаби, ушбу ўйинда "Насаф" жамоаси юртимиз шарафини ҳимоя қилса, рақиб жамоаси таркибида терма жамоамиз аъзоси Сардор Рашидов ҳаракат қилади.

Биз айнан ушбу ўйин арафасида Сардор Рашидов билан боғланиб ўйинда олдинги фикрларини билишга қизиқдик.

— Илк марта халқаро майдонда Ўзбекистон клубларига қарши майдонга чиқасиз. Ўйин ҳақида қандай фикрдасиз?
— Айтганингиздек, илк марта юртдошларимга қарши халқаро майдонда илк марта ўйнайман. "Насаф"га қарши ўйинни интизорлик билан кутяпман. Албатта, қийин ўйин бўлиши кутилмоқда, лекин биз ушбу ўйинда ғалаба қозонмоқчимиз.

— Олий лига ўйинларида "Насаф"га қарши бир нечта ўйинларда майдонга чиққансиз. Ушбу жамоанинг асосий кучи нимада деб ҳисоблайсиз?
— "Насаф" жудаям яхши шаклланган жамоа. Уларнинг кучи жамоавий ўйин кўрсатишади ва сўнгги дақиқагача кураш олиб боришади. Ирродали жамоа деб ҳисоблайман.

— "Ал-Жаиш" Қатар Юлдузлар Лигасида чемпионликни қўлдан бой берди. Энди клубнинг режалари қандай?
— Тўғри, чемпионлик қўлдан бой берилди. Лекин, биз Осиё Чемпионлар лигасидаги иштирокимизни энди бошладик. Шунингдек, Қатар кубогида ҳали курашдан чиққанимиз йўқ. Демак, иккала мусобақада ҳам ғолиб чиқиш имкониятига эгамиз ва олдимизга айнан шундай мақсад қўйилган. Ушбу икки мусобақада ғолиб чиқиш учун қўлимиздан келган барча ишни қилишга тайёрмиз.

Бобур Икромов суҳбатлашди.