Футбол бўйича Европа Чемпионлар Лигасининг нимчорак финалида кетма-кет олтинчи бор мағлубиятга учраган «Арсенал» устози Арсен Венгер «Барселона»га қарши ўйиндан қониққанлигини қайд этиб ўтди. Бу ҳақда УЕФА расмий сайти хабар бермоқда.
Маълумот учун, 16 март, чоршанба куни «Камп Ноу» стадионида бўлиб ўтган «Арсенал»га қарши ўйинда «Барселона» 3:1 ҳисобида ғалаба қозонди. Лондонда кечган биринчи учрашувда ҳам Каталония клуби зафар қучган эди.
«Фақатгина натижа мени ҳайрон қолдирди. Жамоамиз мен ҳозирга қадар кўрган ажойиб уч ҳужумчиси бор энг яхши жамоа билан ўйнади. Ҳисоб тенглашганидан сўнг ‘Барселона’ ишончсиз ўйин намойиш қилди. Бироқ имкониятлардан фойдалана олмадик», — деди Венгер.
Франциялик мутахассис Лондон клубининг кетма-кет олти мавсумдан буён ЕЧЛ чорак финалига йўл олмаётгани борасида ҳам тўхталди: «Сўнгги олти йил давомида биз кейинчалик чемпионликни қўлга киритган жамоага имкониятни бердик. Фақатгина ‘Монако’ бундан мустасно. Қолганларида эса ‘Бавария’, ‘Барселона’ каби рақиблар билан дуч келдик».
УЕФА талқинига кўра учрашувнинг энг яхши футболчиси деб Луис Суарес топилган бўлсада, «Арсенал» устози Лионель Мессининг ҳаракатларига алоҳида тўхталди: «Ўйин сифати ва футболчиларнинг яратувчанлиги борасида рақиб ақлбовар қилмас кучга эга, айниқса, Месси».
«Месси бутун 90 дақиқа давомида бирорта ҳам пасда ноаниқ ҳаракат қилмади. Бундан фақат завқланиш мумкин. Бу ҳақиқий санъат! ‘Барселона’да оддий ҳаётни санъат даражасига айлантира оладиган учта ҳужумчи бор. Бундан мен жабр кўрдим, дунёнинг қолган қисми эса роҳатланди», — дейди Арсен Венгер.
