«Арсенал» жамоаси бош мураббийи Арсен Венгер АПЛнинг навбатдаги турида «Эвертон»га қарши кечадиган сафар баҳси олдидан рақиблар ҳужумчиси 22 ёшли Ромелу Лукаку ҳақидаги фикрларини билдириб ўтди.

«Лукаку? Биз унга ҳали у Бельгиядалигида қизиқиш билдиргандик, аммо Ромелу ўшанда «Челси»ни танлаганди.

Лукаку йилдан-йилга яхшироқ бўлиб бормоқда. Унинг даражаси ўсишига шериклари билан ўзаро яхши тушуниш ҳам муҳим ўрин тутмоқда. Ромелуни ёрқин фаолият кутмоқда. Буни у кўрсатаётган натижалар йил сайин яхшиланиб бораётгани ҳам кўрсатиб турибди.

Қачонки Ромелу «Челси»да бўлганида уни сотиб олишга уринмадик, чунки у ижарага берилганди. Биз Лукакунинг лондонликлар жамоаси сафига қайтишини кутгандик», — дейди Венгер.

Жорий мавсумда Лукаку жамоаси сафида 28 ўйин ўтказди ва 18та гол уриб, 6та голли узатма муаллифи бўлди. Унинг ўтган йилги натижаси эса 36та ўйинда 10та гол ва 6та пас бўлганди.