«Манчестер Сити» бош мураббийи Мануэль Пеллегрини АПЛнинг 31-тури доирасида бўлиб ўтадиган «Манчестер Юнайтед»га қарши ўйин олдидан ўз фикрларини билдириб ўтди.

«Ҳозирча ғалабага имконият бор, таслим бўлиш керак эмас — чемпионлар айнан шундай фикрлашади. Аввал навбатдаги ўйинни ютишимиз керак, ундан кейин эса кўрамиз, ким кўпроқ очко тўплар экан.

Дерби ҳамиша хавфли, айниқса Премьер-лигада, жамоалар қандай ўринларни эгаллаб турганларидан қатъи назар. Ўйин оғир кечади. «Юнайтед» сафида кучли ўйинчилар бор. Майдонга қайси ўйинчи тушишидан қатъи назар — рақиб хавфли. Биз жадвалда «МЮ»ни ортда қолдиришимиз керак, лекин ундан ҳам муҳими — барча жамоаларни ортда қолдириб, 1-ўринни банд этиш.

Мен жамоа шифокори билан гаплашдим. Компани янги жароҳат орттирган. Кўрамиз, у қанчалик тез тиклана олар экан. Балки, бир ойдан кейин майдонга қайта олар. Ўйлайманки, ушбу мавсумда у ҳали ўйнайди. Дастлабки ҳафтада унда қандай жараён кечиши муҳим. Дастлабки тахминга кўра, унинг соғайиши учун 1 ой вақт керак.

Отаменди машғулотларда иштирок этмоқда, юугурмоқда, лекин жароҳатини янгилаб олиш хавфи мавжуд. Кўрамиз, шанба куни у қандай формада бўлар экан.

Насри умумий гуруҳда машғулотларни бошлади. Терма жамоаларнинг ўйинлари туфайли юзага келадиган танаффусда Делф, Насри ва де Брёйне ёшлар жамоамиз сафида назорат ўйинларида иштирок этишади», — дейди Пеллегрини.

«Манчестер Сити» — «МЮ» ўйини бугун Тошкент вақти билан 21.00да бошланади.