Осиё минтақасида ЖЧ-2018 саралашининг 3-босқичига чиққан 12та жамоа билан таништириб ўтгандик. Навбатдаги босқичга қуръа ташлаш маросими 12 апрель куни бўлиб ўтади. Қуръада жамоалар ФИФАнинг 7 апрель куни эълон қилинадиган рейтинги асосида саватчаларга ажратилади.

Мазкур рейтинг асосида жамоалар саватчаларга қандай тартибда ажратилиши аниқ бўлди. Ўзбекистон ва Саудия Арабистони терма жамоалари 3-саватчадан ўрин олишди. Бу жамоалар бир гуруҳдан ўрин олишмайди.

Қолган саватчалар таркиби билан танишинг:

1-саватча: Эрон (рейтинг балли — 672), Австралия (601)
2-саватча: Жанубий Корея (579), Япония (577)
3-саватча: Саудия Арабистони (559), Ўзбекистон (549)
4-саватча: БАА (521), Хитой (423)
5-саватча: Қатар (416), Ироқ (333)
6-саватча: Сурия (316), Таиланд (297).

Эслатиб ўтамиз, қуръа натижасида жамоалар 6тадан иккита гуруҳга ажратилади. Гуруҳларда дастлабки 2та ўринни эгаллаган жамоалар ЖЧ йўлланмасини қўлган киритади. Учинчи ўринни эгаллаганлар эса дастлаб ўзаро плей-офф, сўнгра КОНКАКАФ минтақасининг тўртинчи жамоаси билан қитъалараро плей-офф босқичи орқали Мундиал йўлланмасини қўлга киритишга уриниб кўрадилар. Учинчи босқич ўйинлари 2016 йилнинг 1 сентябридан 2017 йилнинг 5 сентябригача бўлган оралиқда ўтказилади.