"Барселона" ва Месси ўртасида шартнома бўйича музокаралар боши берк кўчага кириб қолган. Бу вақтда эса "Манчестер Сити" жамоаси аргентиналик футболчига жозибали таклиф бермоқда.
Месси ва "Барселона" 2018 йилгача тузилган амалдаги шартномани узайтириш борасида музокара олиб бошлаганди. "Кўк-анорранглилар" футболчи билан шартномани 2021 йилгача узайтиришмоқчи, лекин футболчи бунга шошилмаяпти ва унинг талаби билан музокаралар тўхтатилган. Бу ҳақда инглиз матбуотида ёзилган.
"Барселона" президенти Жозеп Бартомеу футболчи ва унинг агенти бўлган отасига уларнинг талабларини бажариш имконсиз эканини билдирган.
Айни вақтда "Манчестер Сити" Мессига у истаган маошни беришни кўзда тутадиган 5 йиллик шартнома таклиф қилган.
The Sun нашри хабарида айтилишича, гап ҳафтасига 1 млн евро маош тўлаш ҳақида кетмоқда.
Манбанинг ёзишича, футболчи ва "Барселона"нинг ҳамкорлиги давом этиши эҳтимоли кам, "Манчестер Сити"га Гвардиоланинг бош мураббий сифатида келиши ҳам Мессининг танловига таъсир ўтказиши мумкинлиги айтилган.