Португалия терма жамоаси сардори Криштиану Роналду ЖЧ-2026 1/8 финалида Испанияга 0:1 ҳисобида мағлуб бўлганидан кейин ўз фикрлари билан ўртоқлашди.

41 ёшли ҳужумчи мусобақани тарк этганидан қаттиқ изтиробда эканини тан олди. Шу билан бирга, у ўзини майдонда бор кучини сарфламаганликда айблай олмаслигини таъкидлади.

Роналду, шунингдек, Португалия терма жамоаси билан эришган ютуқларини эслаб, Евро-2016 чемпионлиги унинг учун жаҳон чемпионлиги билан тенг аҳамиятга эга эканини айтди.

«Биз яхши ўйин ўтказдик, муносиб ўйин кўрсатдик. Албатта, янада яхшироқ ҳаракат қилишимиз мумкин эди, аммо Испания энг кучли терма жамоалардан бири. Менимча, улар финалгача етиб боради ёки шунга жуда яқин бўлади.

Бундай мағлубиятдан кейин, албатта, хафаман. Аммо мен бор кучимни бердим ва қўлимдан келган барча ишни қилдим. Португалия билан учта соврин ютиб олдим. Криштианугача Португалия ҳеч нарса ютмаган эди.

Мен учун энг катта соврин — Евро-2016 чемпионлиги. Бу мен учун жаҳон чемпионлиги каби қадрли. Эртага янги кун бўлади, ҳаёт давом этади. Мен виждоним тоза ҳолда уйғонаман, чунки ўзимни тўлиқ бахшида қилдим», — деди Роналду.

Эслатиб ўтамиз, ЖЧ-2026 Криштиану Роналду учун фаолиятидаги олтинчи ва сўнгги жаҳон чемпионати бўлди.

Афсонавий португалиялик мундиалларда жами 27 та учрашув ўтказиб, 11 та гол урди ва 2 та голли узатмани амалга оширди. Шунингдек, у жаҳон чемпионатларининг олтита турли мусобақасида гол урган тарихдаги илк футболчи сифатида рекорд ўрнатди.