Италиялик машҳур футболчи ва мураббий Чезаре Мальдини 84 ёшида оламдан кўз юмди.

Фаолиятининг асосий қисмини «Милан» клубига бағишлаган Мальдини 1954 йилдан то 1966 йилгача «қизил-қоралар» шарафини ҳимоя қилган. «Россонерилар» сафида барча турнирларда 412та ўйин ўтказган.

Футболчи сифатида тўрт карра Италия чемпиони бўлди, 1962/1963 йиллар мавсумида Европа Чемпионлари кубогини қўлга киритди. 1967 йили фаолиятини якунлаб, мураббий сифатида иш бошлади. Ўтган вақт мобайнида «Милан», «Парма», Италия ва Парагвай терма жамоаларини бошқарди. Милан клуби Мальдини қўл остида 1972/1973 йиллар мавсумида Италия кубогини қўлга киритган бўлса, айнан шу йили Кубок эгалари кубогида зафар қучди.

Айтиш жоизки, Чезаре Мальдини «Милан» ва Италия термасининг афсонавий сардори Паоло Мальдинининг отаси ҳисобланади.