Футбол бўйича Осиё Чемпионлар Лигасининг «Д» гуруҳида иштирок этаётган Қаршининг «Насаф» клуби мусобақанинг 4-турида Қатар клуби «Ал-Жаиш» билан голсиз дуранг ўйнади — 0:0.
Томонларнинг Қатарда бўлиб ўтган биринчи ўйинида Сардор Рашидовнинг ягона голи «Ал-Жаиш»га 3 очко тақдим этганди. Ўзбекистон миллий терма жамоаси аъзоси Қарши шаҳридаги ўйинни ҳам бошланғич таркибда ўтказди. У биринчи ўйиннинг 87-дақиқасида гол урган бўлса, иккинчи учрашувнинг мана шу дақиқасида алмаштирилди.
4-турдан кейин «Насаф» 4 очко билан ўз гуруҳида 2-ўринни эгаллаб турибди. «Ал-Жаиш» ҳисобида эса эндиликда 10 та очко бор.
Гуруҳнинг иккинчи учрашуви 5 апрель куни Тошкент вақти билан 22:25 да старт олади. Унда Саудия Арабистонининг «Ал-Аҳли» клуби ўз майдонида БААнинг «Ал-Айн» жамоасини қабул қилади. Ҳар икки клуб 3 та ўйинда 3 очко жамғарган.
Осиё Чемпионлар Лигаси
«Д» гуруҳи, 4-тур учрашуви
5 апрель, сешанба
Огоҳлантиришлар: Шерзод Аъзамов, 32 (Н). Мажид Муҳаммад, 35 (А). Артур Геворкян, 84 (Н).
«Насаф»: Элдор Суюнов, Мақсуд Каримов, Шуҳрат Муҳаммадиев, Илҳом Шомуродов, Дилшод Раҳматуллаев, Артур Геворкян, Баҳром Абдураҳимов (Азиз Ғаниев, 78), Эркин Бойдуллаев, Азамат Алланиязов (Бобир Абдухолиқов, 63), Шерзод Аъзамов, Сайдулло Раҳматов.
«Ал-Жаиш»: Халифа Абабакар, Мурод Нажи, Лукас Мендес, Ёсир Иса, Абдураззоқ Ҳамдаллаҳ, Сардор Рашидов (Отман Ал Яҳри, 86), Мажид Муҳаммад, Абдураҳмон Муҳаммад, Холид Аз-Зереқи, Аҳмад Моеин, Ромаринго.
