“Қўқон-1912” жамоасини олдинда жуда муҳим баҳс кутиб турибди. Буни яхши ҳис этиб турган футболчилар машғулотларга зўр беришган. Мураббийлар штаби ҳам футболчиларни ўйинга оптимал формада кириб боришлари учун бор имкониятларини ишга солишмоқда.

Хабарингиз бор, шанба куни Қўқондаги “Марказий” ўйингоҳида вакилларимиз “Бухоро” клубини қабул қилишади. Айни дамга келиб ҳар икки жамоа турнир жадвалида ёнма-ён жойлашган. Муроджон Исмоилов шогирдлари олти очко билан еттинчи ўринда бораётган бўлишса, Жамшид Саидов бошчилигидаги бухороликлар беш очко жамғарган ҳолда саккизинчи поғонадан жой олишган.

Жамоамиз учун мавсум старти муваффақиятли бошланганини таъкидлаш жоиз, “Қўқон-1912” ҳозирга қадар ўтказилган бешта (кубок баҳслари ҳам назарда тутилмоқда) учрашувда майдонга тушиб, тўртта ғалабага эришди.

“Бухоро” ҳам мавсумни яхши бошлади. Жамшид Саидов шогирдлари тўртта ўйиннинг икки ғалаба, икки дурангга эришган.

Кўриниб туридики, шанба куни мухлисларни шиддатли учрашув кутиб турибди.

“Қўқон-1912” – “Бухоро” учрашуви бошланиш вақтлари маълум бўлди. Эртага бўлиб ўтадиган ўринбосарлар баҳси соат 14:00да бошланади. Шанба кунги асосий таркиб ўйини эса соат 16:30 да белгиланган.