“Челси” клубининг янги бош мураббийи Антонио Конте ёзги трансфер бозори чоғида биринчи навбатда марказий ҳимоя чизиғини кучайтиришга эътибор қаратади.

Бу борада асосий нишон сифатида “Рома” клубининг грециялик ҳимоячиси Костас Манолас қаралмоқда. Британия нашрларининг хабар беришича, Антонио Конте Лондон клубида ўз вазифасига киришган кундан бошлаб бу трансферни амалга оширишга киришади. Италиялик мутахассис Евро-2016 якунига етгач, “Челси”ни қабул қилиб олади.

Маълумот учун, Костас Манолас профессионал фаолиятини Афинанинг АЕК клубида бошлаган. 24 ёшли ҳимоячи 2014 йили 10 миллион фунт стерлинг эвазига Италия А сериясига кўчиб ўтган. Ёш бўлишига қарамай, Греция терма жамоаси таркибида 20дан ошиқ ўйинда майдонга тушган.