Маълумки, жорий йилда Фарғонада талабаларнинг шижоат, матонат ва маҳорат кўриги – “Универсиада – 2016” мусобақаларнинг финал босқичи бўлиб ўтади. Айни кунларда вилоятмизда мазкур спорт байрамига қизғин тайёргарлик кўрилмоқда.
Ушбу турнирнинг футбол мусобақасига эса старт берилди. Қорақалпоғистон Республикаси ва вилоят терма жамоалари минтақаларга бўлинган ҳолда саралаш баҳсларини бошлаб юборишди. Ўз минтақаларида ғолиб бўлган жамоалар финал босқичига йўлланма оладилар.
Айни кунларда бўлиб ўтаётган саралаш ўйинларида “Қўқон-1912” жамоасининг икки нафар ўйинчиси ҳам иштирок этишмоқда. Иқбол Маликжонов Фарғона вилояти терма жамоаси шарафини ҳимоя қилаётган бўлса, Наврўз Алимов Қорақалпоғистон Республикаси терма жамоси сафида тўп сурмоқда.
Ҳар икки футболчимизга ҳам Универсиада ўйинларида омад тилаб қоламиз.
