"Ливерпуль" бош мураббийи Юрген Клопп Европа лигасининг чорак финали жавоб учрашувида "Боруссия" Д устидан иродали ғалабадан сўнг (3:4) фикрларини билдирди.
"Нима бўлганини тушунтириб бериш қийин. Бу "Энфильд"га қойилмақом кеча бўлди, тўғрисини айтсам, ғалати ўйин бўлди. Старриж ва Алленни майдонга тушириб, рақибга характер кўрсатмоқчи эканимизни билдирдик. Ютқазганимизда ҳам менга фарқи йўқ эди, аммо биз характер кўрсатишимиз керак эди, буни уддаладик.
Бу ҳақиқий Европа футболи. Буни кўрган нейтрал мухлис ҳам "Футбол - зўр ўйин" деб юборади. Ҳозир ўнг қўлим оғрияпти, нима бўлганини билмайман, кимдир ургандир. Бу унутилмас кеча бўлди", - дейди Клопп.
