Дортмунднинг «Боруссия» жамоаси ярим ҳимоячиси Илкай Гюндоган янги мавсумдан бошлаб фаолиятини «Манчестер Сити»да давом эттириши кутилмоқда.

Bild нашри хабарига кўра, футболчи манчестерликлар жамоаси билан 5 йиллик шартнома хусусида келишувга эришган.

Манбада келтирилишича, футболчининг трансфери учун 24 миллион евро ҳамда бонуслар кўринишида ҳақ тўланади.

Бундан олдинги хабарларда «Манчестер Сити» Гюндоган учун 35 миллион евро таклиф қилаётгани, «Боруссия» эса 45 миллион евро талаб қилаётгани ҳақида айтилганди.

Футболчи германияликлар жамоаси билан шартномани узайтирмади ва у 1 йилдан кейин эркин агентга айланиши мумкин. Унинг хизматларига янги мавсумдан манчестерликлар жамоасида бош мураббий сифатида иш бошлайдиган Хосеп Гвардиола томонидан жиддий қизиқиш билдирилган.

Гюндоган «Сити»га ўтгач, йилига солиқлар чиқариб ташланган ҳолатда 6 миллион евро маош олиши ҳақида ҳам хабар берилган.