«Барселона» ҳужумчиси Лионель Месси Испания чемпионатининг 33-турида «Валенсия»га қарши кечган ва 1:2 ҳисобида якунланган ўйиндаги жавоб голи муаллифи бўлди.
Бу гол унинг футболчилик фаолиятидаги 500-голга айланди. Шундан 450тасини Месси каталонияликлар жамоаси учун урган, яна 50та гол Аргентина терма жамоаси сафида урилган.
Шунингдек, «Валенсия» Мессидан 20та гол ўтказиб юборган тўртинчи жамоага айланди. Месси Ла Лига жамоалари орасида энг кўп голни «Севилья» ва «Атлетико» дарвозасига йўллаган - 25та. Шунингдек, ундан «Реал» ҳам 21та гол ўтказган.
«Валенсия»га қарши ўйингача 28-ёшли бу футболчи 5та ўйиндан иборат голсиз серия ўтказди.
