"Тоттенҳем" клуби бош мураббийи Маурисио Почеттино, агар унинг шогирдлари Премьер-лигада чемпион бўлса, шогирдлари қандай тақдирланиши кераклигини айтиб ўтди.

"Агар биз чемпион бўлсак, ўйлашимча, ҳар бир футболчи ҳайкал қўйилишига арзийди. Мусобақа ҳали давом этади, оралиқ "масофа" ҳам катта. Биз шу пайтгача қандай курашган бўлсак, шундай курашишда давом этишимиз керак. Шундагина бизнинг меҳнатимиз юзага чиққан ва одамлар бизнинг қадримизни сезган бўлишади. Ва биз  ҳам бундан хурсанд бўламиз".

Почеттино "Лестер"нинг чемпион бўлиш эҳтимоли ҳақида ҳам фикр билдирди.

"Ўйлашимча, бу яхши. Улар чемпион бўлишга арзийдилар. Бироқ, афсуски биз ҳозирча улардан орқадамиз. Охиригача курашишимиз керак. Кўпчилик "Лестер"нинг чемпион бўлишини хоҳлаётганини биламиз, бироқ биз ҳам ушбу "ҳикоя"ни ўз фойдамизга ўзгартира олишимизни исботлашимиз керак".