Россия Кубоги ярим финал баҳсида «Амкар» ҳамда «Зенит» ўзаро баҳс олиб борди.

«Амкар» жамоаси аъзоси Брайн Идову учрашувнинг 20-дақиқасида “Зенит” жамоаси дарвозасини ишғол этиб, жамоасини олдинга олиб чиққан бўлса, учрашувнинг 41-дақиқасида Халк томонидан ошириб берилган тўпни Хави Гарсия мезбонлар дарвозаси томон аниқ йўллаб, ҳисобни тенглаштирди.

Шу тариқа, учрашувнинг асосий вақтида дарвозаларга бошқа тўп киритилмади.

Ғолибни аниқлаш учун қўшимча таймлар ҳам ёрдам бермади ва жамоалар пенальтилар сериясида ўз омадларини излашди.

Қизиқарли жиҳати шундаки, пенальтилар сериясида ҳам Хави Гарсия “Зенит”нинг ҳал қилувчи голига муаллифлик қилиб, жамоасини финал сари етаклади.

Россия Кубоги финал учрашуви 2 май куни Қозон шаҳрида бўлиб ўтади.

Россия Кубоги ½ финал.

”Амкар” – “Зенит” 1:1 (3:4)

Голлар: Идову, 20 (1:0); Гарсия, 41 (1:1).

Огоҳлантиришлар: Белоруков, 63; Селихов, 87; Занев, 102; Огуде, 111 – Кокорин, 32; Юсупов, 59; Гарай, 73; Дзюба, 120.
Пенальтилар серияси - 4:5.