Англия Кубогининг финалида тўп сурадиган биринчи жамоанинг номи аниқ бўлди. Бу — «Манчестер Юнайтед».

Луи Ван Гал устозлик қилаётган клуб мавсум бошидан буён ўзи иштирок этган 5 та турнирнинг 4 тасида муваффақиятсизликка учраб, бирорта ҳам совринга эга чиқмаганди. Англия Кубогининг ярим финалида «Эвертон» мағлуб этилгач, «МЮ» мавсумни ҳеч бўлмаганда 1 та соврин билан якунлаш имкониятига эга бўлди.

Англия Кубоги регламентига мувофиқ ярим финал беллашувига ҳам финал бўлиб ўтадиган «Уэмбли» стадиони мезбонлик қилди. 86 064 нафар ишқибоз бевосита стадиондан кузатиб борган ўйиннинг сўнгги дақиқасида Антони Марсьяль ғалабага голини киритишга муваффақ бўлди.

Қайд этиш керак, учрашувнинг 57-дақиқасида «Эвертон»нинг бельгиялик ҳужумчиси Ромелу Лукаку пенальтидан аниқ фойдалана олмади.

Ярим финалнинг иккинчи ўйини эртага, 24 апрель куни «Кристал Пэлас» ҳамда «Уотфорд» клублари ўртасида бўлиб ўтади.

Англия кубоги, ярим финал, 23 апрель, шанба
«Эвертон» — «Манчестер Юнайтед» 1:2
Голлар: Маруан Феллайни, 34 (0:1). Крис Смоллинг, 75-авт (1:1). Антони Марсьяль, 90+3 (1:2).
Ноаниқ пенальти: Ромелу Лукаку, 57 (дарвозабон).
«Эвертон»: Хоэль Роблес Бласкес, Жон Стоунс, Фил Жагелка, Лейтон Бейнс, Муҳаммад Бешич, Аарон Леннон (Херард Деулофеу, 70), Даррон Гибсон, Том Клеверли, Жеймс Маккарти, Росс Баркли, Ромелу Лукаку.
«Манчестер Юнайтед»: Давид де Хеа, Крис Смоллинг, Маркос Рохо, Тимоти Фосу-Менса (Антонио Валенсия, 62), Дейли Блинд, Жесси Лингард, Майкл Керрик, Маруан Феллайни (Андер Эррера, 87), Антони Марсьяль, Уэйн Руни, Маркус Рашфорд.