«Лестер» бош мураббийи Клаудио Раньери жамоасининг чемпионлик учун имкониятлари ҳақида ўз фикрларини билдириб ўтди.

«Маурисио, сен кутишинг мумкин. Яна бир йил. Ҳа, пешқадамларга ҳамиша босим ўтказилади, лекин «Тоттенхэм» мавсум давомида биздан ортда бўлди ва мени кўп хавотирга солмади. Мен 5 очколик фарқни сақлаб қолишни истардим.

Мен ҳамиша қувловчи ролида бўлганман. Агар чемпионликни қўлга кирита олмасак, "Эҳ, Раньери ҳамиша иккинчи бўлган", дейдиганлар топилади. Ҳа, шундай бўлган, лекин менинг фаолиятимга назар ташланг: мен "Челси"да иккинчи ўринни эгаллаганман, аммо жамоа шаклланишни бошлаганига бир йил бўлганди, ўйинчилар энди харид қилина бошланганди. Шундай ҳолатда биз 2-ўринни банд этганмиз.

«Рома»да ҳам иккинчи бўлганман. Мен учинчи тур олдидан жамоага келганимда, жамоа ҳисобида ноль очко бор эди. Якунда биз 80 очко тўплаганмиз, "Интер" эса 82. Мен совринни қўлдан чиқарганман, лекин бундан ортиғи имкониятим етармиди? «Ювентус»га келганимда, жамоа Б сериядан энди чиққанди. Биз аввалига 3-ўринни эгаллаб тургандик, мавсум сўнгги 2-ўринга кўтарилдик. Бундан ортиғини бажариш мумкин, деб ўйлайсизми? Жамоада беш нафардан ортиқ чемпион йўқ эди, қолганлар ёш ўйинчилар эди.

Ниҳоят, «Монако» билан Лига-2да биринчи ўринни эгаллаганмиз, келаси мавсумда эса "ПСЖ"дан кейин иккинчи бўлганмиз. Энди эса бу ерда олтин медални қўлга киритишга ҳаракат қиламан», — дейди Раньери.