Пойтахтимиздаги “Ўзбекистон” спорт саройида оғир атлетика бўйича ўтказилган Осиё чемпионати якунларига кўра Ўзбекистон аёллар терма жамоаси XXXI ёзги Олимпиада ўйинларига йўлланма олди.    Эркаклар терма жамоамиз сўнгги икки жаҳон чемпионатлари якунларига кўра, “Рио-2016” ўйинларининг йўлланмаларини нақд қилиб қўйишгани боис, асосий эътибор аёллар терма жамоамизга қаратилди ва қувонарлиси спортчиларимиз ўзларига билдирилган ишончни оқладилар.    Маълумки, мазкур қитъа чемпионатида 1-6 ўринларни эгаллаган аёллар терма жамоалари биттадан лицензияга эга бўлишлари белгилаб қўйилганди (бунга қадар йўлланмаларга эга бўлган жамоалардан ташқари).    Таркибида етти нафар спортчи билан баҳсларга киришган Ўзбекистон аёллар терма жамоаси якунда қўшимча йўлланмаларга даъвогарлик қилганлар орасида Вьетнамдан кейин 2-ўринни эгаллади. Кейинги поғоналардан жой олган Ҳиндистон, Мўғилистон, Филиппин ва Туркманистон аёллар терма жамоаларига ҳам биттадан лицензия ажратилди.    Шундай қилиб, XXXI ёзги Олимпиада ўйинларига эркаклар терма жамоамиз 5 та, аёллар терма жамоамиз эса 1 та йўлланмани қўлга киритдилар.    Маълумки, оғир атлетика спорт турида йўлланмалар терма жамоаларга берилади. Шу боис, “Рио-2016” ўйинларига йўл оладиган спортчилар номи ўйинлар арафасида Ўзбекистон оғир атлетика федерацияси томонидан эълон қилинади.