Англиянинг «Портсмут» клуби собиқ директори Роман Дубов АПЛда «Лестер»нинг чемпион бўлиши борасида ўз фикрлари билан ўртоқлашди. 

«Лестер» чемпионликка эришгани орқасидан қарийб 190 миллион евро ишлаб олди, аммо тахминан шунча миқдорда маблағ клубнинг амалдаги хўжайинлари томонидан олти йил ичида сарф этилди. Албатта, бу катта миқдорда пул, аммо барибир бу жамоанинг премьер-лигадаги кучли 5-6 жамоа орасидан муқим жой эгаллаб туриши учун етарли бўлмайди. 

Бундан ташқари, «тулкилар» кучли инфраструктурага эга жамоа саналмайди. Уларнинг академияси ҳаттоки АПЛнинг энг кучли ўнталигига ҳам кирмайди. Ҳали болалар-ўсмирлар футболи учун жуда кўплаб сарф-харажатлар қилиниши керак. «Лестер» бу пулларни қўлга киритгач, қандай бошқарув йўлини танлайди, билмайман. Балки улар чемпионлар лигаси йўлланмасини берувчи тўртликдан жой олиш мақсадида улкан харидларни ҳам амалга ошириши мумкин. 

Ҳозирда АПЛ етакчи ва ўртамиёна жамоалари ўртасидаги тафовут аср бошидаги каби фалокатли даражада эмас. Лига футболчиларининг даражаси тенглашиб бормоқда. Бу эса инглиз футболида ким ғалаба қозонишини айтиш қийинлиги жиҳати билан ҳам эътиборни жалб қилишда давом этади. Аммо бу ерда етакчи бўлиш учун топ-клубларда мавжуд — скаут хизмати, академия, тижорат структуралари яхши ишлаши керак. Шу томондан олиб қараганда кичик жамоалар етакчилардан ортда қолишда давом этмоқда. Шунинг учун ҳам «Лестер»нинг чемпионлиги лигада етакчиларнинг алмашаётганини билдирмайди.

«Сандерленд» ва «Манчестер Юнайтед» даромадларини солиштириб бўлмайди. Улар ўртасидаги фарқ қисқараётган бўлсада, барибир бу оралиқ тафовут сезиларли даражада бўлиб қолаверади. «Лестер»нинг «сапчиш»лари ниманидир ўзгартира олади деб ўйламайман. Тўғри, улар жуда кўп жамоалар учун умид бағишлашди, бироқ яқин йилларда Англия чемпионатида етакчи жамоаларнинг ўзгаришини кутишдан фойда йўқ.

Катта клублар ўз жойида қолишади — булар «Арсенал», «Манчестер Сити», «Манчестер Юнайтед», «Челси», «Ливерпуль», кейин эса «Тоттенҳэм», – дея гапириб ўтган Дубов «Известия»га берган интервьюсида.