Мадриднинг «Реал» жамоаси Forbes журналининг талқини бўйича дунёнинг энг қиммат футбол клублари орасида биринчи ўринни сақлаб қолди, деб хабар бермоқда «Чемпионат».

Мадрид клубининг тахминий қиймати 3,65 миллиард долларга баҳоланмоқда. «Реал» ушбу кўрсаткич бўйича фақатгина Миллий футбол лигаси (NFL)нинг америка футболи жамоаси, қиймати 4 миллиард долларга баҳоланган «Даллас Ковбойз»га имкониятни бой бермоқда.

«Реал» 2014/15 йилги мавсумда 694 миллион доллар даромад топган. Клубнинг даромади Adidas ва Emirates билан ҳомийлик шартномалари, телетрансляциялар ҳуқуқи қимматлашиши ва еврокубоклардаги иштироки эвазига ҳар йили 7,7 фоизга ошмоқда.

Энг қиммат футбол клублари орасида 3,56 миллиард долларга баҳоланган «Барселона» иккинчи, қиймати 3,32 миллиард долларга баҳоланган «Манчестер Юнайтед» эса учинчи ўринда бормоқда.

Қайд этиш жоиз, «Реал» кетма-кет тўртинчи йил дунёнинг энг қиммат футбол клуби бўлиб келмоқда.

Forbes талқини бўйича дунёнинг энг қиммат 10 клуби рўйхати қуйидагича кўриниш олган:

1. (1) «Реал Мадрид» – 3,645 млрд доллар
2. (2) «Барселона» – 3,549 млрд
3. (3) «Манчестер Юнайтед» – $3,317 млрд
4. (4) «Бавария» – 2,678 млрд
5. (7) «Арсенал» – 2,017 млрд
6. (5) «Манчестер Сити» – 1,921 млрд
7. (6) «Челси» – 1,661 млрд
8. (8) «Ливерпуль» – 1,548 млрд
9. (9) «Ювентус» – 1,299 млрд
10. (13) «Тоттенҳэм» – 1,017 млрд

Изоҳ: Қайс ичида жамоаларнинг ўтган йилдаги ўрни кўрсатилган.