Олдинроқ Россия чемпионатида тўп сурган ўзбекистонлик футболчилар ҳақидаги мақоланинг биринчи ва иккинчи қисмларини эътиборингизга ҳавола этган эдик. Бу сафар учинчи қисм билан танишиб чиқишингиз мумкин. 

21. Даврон Файзиев 
Ўйнаган жамоалари: “ЦСКА” (2000-2001), “Алания” (2002) 
Файзиев 2000 йили Самарқанднинг “Динамо”сидан Москванинг “ЦСКА”сига ўтиб кетди. У икки мавсум давомида ушбу жамоа таркибида Россия чемпионатида 23 та учрашувда майдонга тушди. Даврон Москвадаги 2 йиллик саргузаштлардан кейин Владикавказнинг “Алания”сига ўтиб, бу клубда 1 йилда 12 марта майдонга тушди. У 2003 йили Наманганнинг “Навбаҳор” жамоасига йўл олди ва Россиядаги фаолиятига “нуқта” қўйди. 

22. Николай Ширшов 
Ўйнаган жамоаси: “Ростов” (2000-2005) 
Терма жамоамиз тарихидаги энг сермаҳсул ҳимоячи ҳисобланадиган Ширшов 2000-2005 йиллар давомида “Ростов” сафида Россия чемпионатида 120 учрашувда майдонга тушиб бир гол урди. У жамоанинг ҳақиқий етакчиларидан бири эди. Николай “Ростов”дан кетганидан кейин, Россиянинг қуйи дивизион жамоаларидаа тўп сурди. 

23. Улуғбек Бақоев 
Ўйнаган жамоалари: “ЦСКА” (2000), “Торпедо-ЗИЛ” (2001-2002) 
“Бухоро” сафида танила бошлаган Бақоев 2000 йили Москванинг “ЦСКА” жамоасига ўтди. Бироқ Улуғбек Москвада ўз ўйинини топа олмади. 7 учрашувда бирорта ҳам гол ура олмаган ҳужумчи, кейинги мавсумни “Торпедо”да ўтказди. Афсуски бу жамоада ҳам Бақоевнинг ишлари юришмади – 20 учрашувда 0 гол. Шундан кейин у яна “Бухоро”га қайтишга қарор қилди. 

24. Владимир Радкевич 
Ўйнаган жамоаси: “Ротор” (2002-2004) 
Радкевич 2002 йили “Нефтчи”дан “Ротор”га йўл олди. Волгоградликлар таркибида уч мавсум мобайнида 81 учрашувда иштирок этиб, 4 та гол урган Владимир шундан кейин Россия қуйи лигаси вакиллари сафида тўп суриб, 2010 йили фаолиятини жонажон жамоаси “Нефтчи”да якунлади. 

25. Бахтиёр Ашурматов 
Ўйнаган жамоалари: “Спартак-Алания” (2003), “Торпедо Металлург” (2003), “Криля Советов” (2005-2006) 
Ашурматов 2003 йили “Спартак-Алания” жамоаси сафига келиб қўшилди. У бундан олдинги мавсумни “Пахтакор”да ўтказган эди. Ярим мавсум давомида Владикавказликлар учун 6 ўйинда иштирок этган Бахтиёр, мавсумнинг иккинчи қисмини “Торпедо Металлург”да ўтказиб, бу жамоада 5 та ўйинда майдонга тушди. Шундан кейин яна 2 йилни “Пахтакор”да ўтказган ҳимоячи, 2005-2006 йилларни “Криля Советов”да ўтказди. Бироқ бу давр оралиғида у Россия чемпионаатида фақатгина битта ўйин ўтказди холос. 

26. Александр Гейнрих 
Ўйнаган жамоалари: “ЦСКА” (2003-2004), “Торпедо” Москва (2005-2006) 
2003 йили “ЦСКА” “Пахтакор”нинг 19 ёшли ҳужумчиси Гейнрихни ўз сафига қўшиб олди. Саша “харбийлар” таркибида 2 йил давомида чемпионатда 2 ўйинда битта гол урди ва 2003 йили Россия чемпионлигини қўлга киритди. 2005 йилнинг ярмини “Пахтакор”да ўтказган Александр яна Россияга қайтди ва бу сафар Москванинг бошқа бир жамоаси “Торпедо” билан шартнома тузди. Бироқ унинг қайтиши омадли келмади. Чемпионатда 21 ўйинда майдонга тушган Гейнрих бирорта ҳам гол ура олмай, 2007 йили “Пахтакор”га қайтди. 

27. Виктор Карпенко 
Ўйнаган жамоаси: “Шинник” (2000-2004) 
Карпенко 2000 йили “Қизилқум”дан “Шинник”га ўтган эди. У Ярославл жамоаси билан икки йил давомида биринчи дивизионда тўп суриб, 2002 йилда Премьер лигага йўл олди. 4 мавсум давомида 71 учрашувда 13 гол киритган Виктор 2005 йили Қозоғистон чемпионатига кўчиб ўтди. 

28. Ярослав Крушелницкий 
Ўйнаган жамоаси: “Ротор” (2004) 
“Пахтакор” таркибида ажойиб ўйинлар намойиш этган Крушелницкий 2004 йили ‘Ротор”га ўтди. Бироқ Ярославнинг Премьер лигадаги ишлари юришмади. Бир мавсум давомида атиги 1 ўйинда майдонга тушган ҳимоячи кейинги мавсумда Ўзбекистонга қайтиб, “Навбаҳор” билан шартнома тузди. 

29. Марат Бикмаев 
Ўйнаган жамоалари: “Криля Советов” (2004-2005), “Рубин” (2006-2007), “Спартак-Налчик” (2008-2010), “Алания” (2010-2012) 
Бикмаев 2004 йилги Осиё кубогидан кейин “Пахтакор”ни “Криля Советов”га алмаштирди. Самараликлар учун икки мавсумда 5 та ўйин ўтказган ёш ҳужумчи, 2006 йили “Рубин”га ўтди. Афсуски у Козон жамоаси либосида Россия чемпионатида майдонга тушмади. 2008 йили Налчикнинг “Спартак”ига ўтган Марат 3 йил давомида 48 учрашувда 3 та голга муаллифлик қилди. Шундан кейинги 3 мавсумни у “Алания”да ўтказди ва бу жамоа таркибида 56 ўйинда 13 та голга муаллифлик қилди. У Владикавказликлар билан Россия кубоги финалига чиққан эди. 

30. Леонид Кошелев 
Ўйнаган жамоаси: “Шинник” (2005-2006) 
Кошелев 2005 йили “Пахтакор” либосини “Шинник”никига алмаштирди. У Россия чемпионатида ушбу клуб учун икки мавсум давомида 14 ўйин ўтказиб, рақиблар дарвозасини бир марта ишғол қилишга мувааффақ бўлди. Лео шундан сўнг 2007 йили яна “Пахтакор”га қайтишга қарор қилди. 

Давоми бор 

Фурқат Юсупов