Олий Лига 9-турида мамлакатимизнинг икки гранд жамоалари ўзаро тўқнаш келди ва “Локомотив” – “Пахтакор” учрашувида “темирйўлчилар” кичик ҳисобда ғалаба қозонишди.

Учрашувда ҳал қилувчи гол муаллифига айланган ҳужумчи Темурхўжа Абдухолиқов SPORTS.uz интернет-портали мухбирига ўйин борасидаги таассуротларини билдириб ўтди.

"Ўйин осон ўтмади. Айниқса, иккинчи бўлимда “Пахтакор” футболчилари катта куч билан олдинга ўтишди. Ўзи умуман “Пахтакор” мамлакатимизнинг энг етакчи жамоаларидан бири саналади. Шу сабабли ҳам ушбу ўйиндаги ғалаба икки ҳисса ёқимли бўлди. Умид қиламанки, ушбу ғалабали сериямизни кейинги учрашувларда ҳам давом эттирамиз.

Иккинчи бўлимда ҳужумкорликни бироз пасайтирганимизга сабаб эса ҳисобда олдинда бораётганимиз бўлди. Рақиб олдинга ўтишга мажбур эди. Биз эса таваккал қилиб ҳужум қилишда давом эта олмасдик. Қолаверса, “Пахтакор” сафида қарши ҳужумлардан унумли фойдалана оладиган футболчилар сони кўпчиликни ташкил этади. Шу сабабли асосан ҳимояландик. Шукр, асосийси – вазифани уддалай олдик.

Бу сафар собиқ жамоамга гол киритиб, ортиқча хисларга берилмадим. Ўтган гал бироз бошқачароқ бўлганди. Аммо ундан бери анча вақт ўтди. Қолаверса, мен эндиликда “Локомотив” аъзосиман ва “Локо” муваффақиятларига ўз хиссамни қўшаётганимдан хурсандман", - дейди тажрибали ҳужумчи.