Европа Иттифоқи полиция хизмати – Европолда Францияда ёз бошида ўтказиладиган футбол бўйича Европа чемпионати вақтида терактлар содир этилиши мумкинлиги айтилди. Бу ҳақда ташкилот директори Роб Уэйнрайт Die Welt нашрига берган интервьюсида айтиб ўтди.
"Мен Европа чемпионатини катта хавотир билан кутмоқдаман", деб айтмоқда Уэйнрайт. У чемпионат "террорчиларни ўзига тортувчи нишон" эканлигини таъкидлаб ўтди.
"Кафе, ресторан ва концерт заллари каби ҳимояланмаган нишонларга ҳужум қилиш осон. Полиция учун бу ўзига хос чақириқдир", деб айтди Уэйнрайт.
Уэйнрайтнинг айтишича, Европадаги барча эҳтимолий террорчилар ортидан кун бўйи кузатишнинг имкони йўқ, чунки бунинг учун етарлича ресурслар мавжуд эмас. Бундан ташқари, бу "эркин демократия тушунчасига" зид келади.
Париж ва Брюсселда терактлар амалга оширилгандан кейин Европа махсус хизматлари ўзаро ҳаракатларни кучайтиришди, ахборот билан фаолроқ алмашишни бошлашди, бироқ бу етарли бўлмаяпти. Уэйнрайтнинг фикрича, Европадв "ким жуда хавфли ҳисобланиши"нинг ягона таърифи йўқ. Европа давлатлари бу масала бўйича ягона тўхтамга келишлари керак.
Европа чемпионати 10 июндан 10 июлгача давом этади. Чемпионат учрашувлари Франциянинг 10 шаҳридаги 10 та стадионда бўлиб ўтади.
