Қозоғистоннинг Алмати шаҳрида дзюдо кураши бўйича ўтказилган Гран При турнири якунига етди. Дунёнинг 83 давлати вакиллари иштирокида ўтказилган мазкур мусобақада XXXI ёзги Олимпиада ўйинларининг йўлланмалари учун рейтинг очколар ҳам ўйналди.    Қизғин кечган мусобақалар якунларига кўра уч нафар ҳамюртимиз Диёрбек Ўрозбоев (-60 кг), Шарофиддин Лутфуллаев (-60 кг) ва Соиб Қурбонов (-100 кг) бронза медалларини қўлга киритдилар.    Диёрбек Ўрозбоев саралаш баҳсларида Миср, Швейцария ва Қирғизистон вакилларини енгиб, ярим финалда мезбонлар вакили Рустам Ибраевга имкониятни бой берди. Бронза медали учун кечган беллашувда Диёрбек Қозоғистон терма жамоасининг яна бир аъзоси Асхат Телмановни мағлуб этди.    Шарофиддин Лутфуллаев эса саралаш баҳсларида Яман, Беларус ва Қозоғистон спортчилари устидан зафар қучиб, ярим финалда Элиос Манзи (Италия)га ютқазди. Бронза медали учун кечган беллашувда Шарофиддин қозоғистонлик Алибек Имашевдан устун келди ва у ҳам учинчи ўринни эгаллади.    Оғирлик вазни 100 кг.гача бўлган полвонлар баҳсида иштирок этган Соиб Қурбонов саралаш босқичида Словения ва Эстония вакилларини мағлуб этиб, озарбайжонлик Элхан Маммадовга имкониятни бой берди. Ўтиш турнири орқали бронза медали учун баҳсларни давом эттирган Соиб Қурбонов дастлаб 2015 йилги Осиё чемпионати совриндори Саиджалол Саидов (Тожикистон)ни, учинчи ўрин учун кечган беллашувда эса Куба вакили, 2014 йилги Жаҳон чемпионати кумуш медаль совриндори Хосе Арментеросни мағлуб этди.    Эслатиб ўтамиз, мазкур Гран При турнирида олтин медаль соҳиби 300 рейтинг очкога, кумуш медаль совриндори 180 рейтинг очкога ва ниҳоят учинчи ўринни эгаллаган полвонлар 120 рейтинг очкосига эга бўладилар. Бундан ташқари бешинчи ўрин эгалари 60 рейтинг очкони, 7 ўринни банд этган спортчилар эса 48 рейтинг очкони қўлга киритишлари мумкин.