Бугун ОЧЛ-2016 нимчорак финал жавоб баҳсидан ўрин олган “Локомотив” – “Ал-Ҳилол” ўйинолди матбуот анжумани бўлиб ўтди. Унда журналислар саволларига биринчи бўлиб меҳмонлар устози жавоб берди.

"Мен Ўзбекистонга яна келганимдан хурсандман, - деди  Абдуллатиф Ал-Ҳусайний. - Ростини айтсам, биз юртингизга Осиёда энг кучли жамоалардан эканимизни исботлашга келдик. Мен янги тайинланганимга қарамай, терма жамоа ва клубларда бу футболчиларнинг аксарияти билан ишлаганман. Уларнинг имкониятини жуда яхши биламан. Шунинг учун ҳам яқинда тайинланганим муаммо бўлмайди. Таркибда тажрибали футболчимиз Аш-Шамроний майдонга туша олмайди. Қолган ҳамма ўйинга шай. Эртанги учрашув биз учун ҳаёт-мамот баҳси бўлади ва биз юртимизга ғалаба билан қайтмоқчимиз".

"Шуни айтишим мумкинки, эртага умуман бошқача тактикада тўп сурамиз, - дея гапини давом эттирди Абдуллатиф  Ал-Ҳусайний. - Биз ўтмишни эсдан чиқардик ва ҳамма эртанги ўйин ҳақида ўйламоқда. Бизга ғалаба керак, голлар керак ва биз мусобақада бош совринни қўлга киритишни ўйлаяпмиз".

Матбуот анжуманида иштирок этган "Ал-Ҳилол" ўйинчиси Диаго ҳам ўз фикрлари билан ўртоқлашди:

"Эртанги ўйинда ғалаба қозониш биз учун жуда муҳим, - деди футболчи. - Биринчи ўйинда "Локомотив" футболчилари бирдамлик билан ҳаракат қилди ва ижобий натижа қайд этди. Биз эртага гол уришга мажбурмиз. авваллари ярим финалдан қайтганмиз. Энди бизнинг давримиз келди ва ғалаба учун ўйнаймиз".