Евро-2016 турниридан бир ҳафта олдин нуфузи жиҳатдан Европа Чемпионатидан кейинги ўринда турувчи Америка Кубоги баҳсларига старт берилади.

«Спорт» телеканалининг келаётган янги ҳафта (6-12 июнь) учун «Эрудит Спорт» газетасига берилган ТВ-дастурларида ёзилишича, «Спорт» ТВ Америка Кубоги-2016 учрашувларини жонли эфирда намойиш этади. Ушбу баҳсларнинг бошланиш вақти бизнинг вақт билан асосан тонг саҳарда тўғри келаётганлиги боис, марказий учрашувлар кундузги ва кечги эфирларда ҳам такроран намойиш этилади.

«Спорт» телеканалининг жорий ҳафтадаги, аниқроғи шанба ва якшанба кунги ТВ-дастурларида Америка Кубоги ўйинларининг намойиш этилиши маълум қилинмаган бўлсада, Тошкент вақти билан 4 июнь, шанба куни тонгги соат 06:30 да АҚШ – Колумбия ўйини билан старт оладиган турнир транляцияси ҳуқуқини қўлга киритган телеканал ушбу учрашувдан бошлаб баҳсларни намойиш этиш эҳтимоли катта.

Турнирнинг 100 йиллик юбилейи муносабати билан АҚШнинг 10 та стадионида ўтказиладиган ушбу қадимий турнир барчада катта қизиқиш уйғотиши табиий. Зеро, жаҳон футболида ўз ўрнига эга бўлган Месси сардорлигидаги Аргентина, Неймар етакчилигидаги Бразилия, Суарес ва Кавани жуфтлигидаги Уругвай, Санчес-Видаль етакчилигидаги Чили, Хамес Родригес иштирокидаги Колумбия, тўпурар Чичарито бошчилигидаги Мексика каби терма жамоаларнинг шиддатли қарама-қаршилиги ҳеч бир ишқибознинг эътиборидан четда қолмаслиги аниқ.

Дарвоқе, Америка Кубогининг тўлиқ тақвими ва ўйинларни қабул қилувчи стадионлари билан «Эрудит Спорт» газетасининг кечаги №67-сонида танишишингиз мумкин.