“Манчестер Юнайтед” клуби бош мураббийи Жозе Моуриньо бошчилигидаги Англия терма жамоаси ўртоқлик ўйинида Клаудио Раньери бошқараётган Жаҳон терма жамоасини 3:2 ҳисобида мағлуб этди. Бу ҳақда “МЮ” матбуот хизмати хабар тарқатди. 

«Ливерпуль» клубининг собиқ ҳимоячиси Марк Райт 51-дақиқада ҳисобни очди. Орадан бироз ўтгач, жаҳон терма жамоасида ўйнаётган Димитар Бербатов кетма-кет 2 гол урди. Бироқ ўйин якунида Жермейн Дефо ҳам 2 гол уриб, ўз жамоасига ғалаба келтирди.

Ўйинда Дэвид Симен, Сол Кэмпбелл, Жейми Каррагер, Дида, Кафу, Эдгар Давидс, Роналдиньо ва бошқа футболчилар майдонга тушишди. ЮНИСЕФ ҳамкорлигида, “Олд Траффорд”да ўтган бу ўйиндан сўнг, ташкилотчилар бир неча миллион фунт маблағни тўплай олишди. Бу пуллар хайрия мақсадлари учун сарфланадиган бўлди.

Қайд қилиш жоизки, португалиялик мураббий 2014 йилда ўтказилган бундай ўйинда Жаҳон терма жамоасини бошқарган ва ғалаба қозонган эди.