Россия терма жамоаси бош мураббийи Леонид Слуцкий ва жамоа футболчилари ўз мухлисларига мурожаат қилиб, Евро-2016’нинг қолган ўйинларида ўзларини интизомли тутишни сўрашди.
"Ҳурматли мухлислар! Биз сиз Россия термасига Евро-2016’нинг Англияга қарши дастлабки учрашувда кўрсатган қўллаб-қувватловингиз учун миннатдормиз. Кўп жиҳатдан айнан шу омил сабабли биз ўйин охирида муҳим гол уришга ва мусобақадаги биринчи очкони қўлга киритишга муваффақ бўлдик. Олдинда бизда Словакия ва Уэльсга қарши мураккаб ўйинлар бор, биз бу ўйинларда ҳам трибуналар қўллаб-қувватлашига умид қиламиз.
Шу туфайли биз Лилл ва Тулузадаги ўйинларга ташриф буюрмоқчи бўлган россиялик футбол мухлисларига илтимос билан мурожаат қилмоқчимиз – ўзларингизни интизомли тутинглар, стадион ва жамоатчилик жойларида ўзини тутиш қоидаларини бузманг. Халқаро футбол ташкилотлари учун келгусида мухлислар томонидан ҳеч қандай қоидабузарлик бўлмаслигига кафолат жуда муҳимдир.
Ўз томонимиздан биз футбол майдонида яқин учрашувларда барча кучимизни беришни давом эттирамиз ва давлатимизни Европа чемпионатида муносиб тақдим қилиш учун барча имкони бор нарсани амалга оширамиз", деб ёзилди Россия футбол иттифоқи расмий сайтида.
Аввалроқ УЕФА Англия ва Россия терма жамоаларини Евро-2016 иштирокчилари сафидан чиқариб юбориши мумкинлиги маълум бўлганди. Агар мухлислар томонидан безориликлар давом этса, бундай ҳолат юз бериши мумкин.
УЕФА икки давлатга Марселдаги Анлия-Россия учрашуви вақтидаги тартибсизликлардан сўнг огоҳлантириш қилди.
