Францияда бўлиб ўтаётган футбол бўйича Европа чемпионати майдонларида сигарет чеккан мухлислар сариқ ва қизил карточкалар орқали огоҳлантирилмоқда. Тартибга риоя этмаслик ҳатто аренадан бадарға этишгача олиб келиши мумкин, лекин ҳали бундай ҳол кузатилмаган. Бу ҳақда турнир кўнгилли иштирокчиларидан бири Мария Мальцева сўзларига таяниб ТАСС хабар қилди. 

Чемпионат давомида нафақат майдонлар, балки уларга тегишли ҳудудларда ҳам тамаки маҳсулотларини чекиш ва электрон сигаретлардан фойдаланиш тақиқланади. Мазкур қоидалардан мухлисларни бохабар этиш учун кўнгиллилардан таркиб топган махсус гуруҳ (Health&Respect) фаолият юритмоқда. 

“Ушбу қоидаларни бузган ҳар бир киши аввалига мулойимлик билан чекиш мумкин эмаслиги тўғрисида огоҳлантирилади. Агар тартиббузар чекишда давом этса, кўнгилли назоратчи унга сариқ карточка беради, шунда ҳам қоидабузарлик тўхтатилмаса, у қизил карточка билан “сийланади”. Мухлис тартибга риоя этишдан бош тортса ёки ўзини тажовузкорона тутса, кўнгилли назоратчи  тартиб посбонларига мурожаат этишга мажбур бўлади. Тартиб посбонлари вазиятга қараб уни майдон ҳудудидан чиқариб юбориш ваколатига ҳам эга”, - аниқлик киритди Мария. 

Кўнгилли назоратчининг айтишича, матчдан сўнг ҳар бир волонтёр тақдим этилган сариқ ва қизил карточкалар ҳамда содир бўлган ҳодисалар тўғрисида махсус кундалигига ҳисобот ёзиб қўяди. “(11 июнь Марселда бўлиб ўтган) Англия ва Россия учрашувида мен 22 та сариқ ва битта қизил карточка бердим. Тартиб посбонларини чақиришга ҳожат бўлмади”, - дейди у.