Франция терма жамоаси жуда қийин кечган баҳсда Албанияни 2:0 ҳисобида мағлуб этди ва кейинги босқичга чиқиш масаласини ҳал қилди.

Бутун ўйин давомида ташаббусга эга бўлган французлар рақиб дарвозасига йўл тополмай жуда қийналишди. Биринчи бўлимда ҳар иккала терма жамоада яхши вазиятлар бўлди. Жиру ва Марсиал ҳужумда бир қатор имкониятлардан фойдалана олишмади. Ўз навбатида албаниялик футболчилардан Леняни ва Мемушайнинг зарбалари хавфли бўлди, уларга ҳам аниқлик етишмади.

Иккинчи таймда Мемушай ва Жирунинг зарбаларидан сўнг, тўп дарвоза устунига тегиб қайтди. Ўйин дуранг ҳисобида якунланадигандек туюлганда Франция барибир гол ура олди.

90-дақиқада Одил Рами ўнг қанотдан тўпни жарима майдонига етказганида, ҳимоячилар эътиборидан четда қолган Гризманн боши билан аниқ зарба йўллаб, ҳисобни очди.

Бор кучи билан олдинга ташланган албанияликлар сўнгги дақиқаларда рақибнинг тезкор қарши ҳужумини ўтказиб юборишди. Тиниб-тинчимаган Димитри Пайет чап қанотдан жарима майдонига кириб келди ва бир алдамчи ҳаракатда икки ҳимоячини алдаб ўтиб, дарвозанинг узоқ бурчагига тўпни йўллади.

Бу ғалабадан сўнг Франция кейинги босқичга чиқиш масаласини ҳал қилди. Албанияда ҳам плей-оффга чиқиш имконияти бор. Бунинг учун улар сўнгги турда Руминияни мағлуб этишлари шарт.

15 июнь, Марсель, «Велодром»

Франция – Албания 2:0 (0:0)

Голлар: Гризманн (90), Пайет (90+5)

Франция – Льорис, Рами, Эвра, Санья, Косьельни, Канте, Матюиди, Пайет, Коман (Гризманн, 68), Марсиал (Погба, 46), Жиру (Жиньяк, 77).

Албания – Бериша, Леняни, Маврай, Айети (Весели, 85), Лиля (Роши, 71), Мемушай, Кукели (Жака, 74), Хюсай, Абраши, Аголи, Садику.

Огоҳлантиришлар: Кукели (55), Абраши (81), Канте (88).