Италия терма жамоаси гуруҳнинг иккинчи ўйинида ҳам ўз услубида ғалаба қозонди. Сўнгги дақиқаларда Швеция ўз дарвозасидан гол ўтказиб юбориб, мағлубият аламини тортишга мажбур бўлди.

Ибраҳимович жамоадошлари 1-турда Ирландия билан дуранг ўйнагани боис, бу баҳсда мағлуб бўлишга ҳақлари йўқ эди. Аммо шведлар "скуадро адзурра" дарвозасига йўл топа олмадилар. Беш нафар ҳимоячи билан ўйнаган Конте жамоаси 80 дақиқа давомида фақат мудофаа ҳақида бош қотирди, катта куч билан олдинга ўтмади. Натижада мухлислар хавфли вазиятларга гувоҳ бўлишмади. Фақатгина сўнгги 10 дақиқа ичида итальянликлар иккита вазият яратишди ва уларнинг бирини гол билан якунлашди.

Дастлаб Флоренци чап қанотдан узатма берганидан кейин Пароло бош билан берган зарба натижасида тўп дарвоза тўсинига тегиб, юқорига кўтарилиб кетди. Ўйин тугашига 2 дақиқа қолганида эса Кьеллини қанотдан тўпни улоқтириб бергани кейин Эдер тўпни эгаллади ва ҳимоячиларни чалғитганча жарима майдончасига кирар-кирмас аниқ зарба билан дарвоза бурчагини ишғол қилди.

Натижада Италия икки ўйиндан кейин 6 очко билан муддатидан аввал плей-офф йўлланмасини ҳал қилди. Швеция ҳисобида ҳозирча 1 очко бор, холос.

Евро-2016. "Е" гуруҳи, 2-тур
ИТАЛИЯ - ШВЕЦИЯ - 1:0 (0:0)
Гол: Эдер (88)
Италия – Буффон, Бардзальи, Бонуччи, Кьеллини, Пароло, Флоренци (Стураро, 85), де Росси (Мотта, 74), Кандрева, Жаккерини, Пелле (Дзадза, 60), Эдер.
Швеция – Исакссон, Линделеф, Ольссон, Юханссон, Гранквист, Ларссон, Экдаль (Левицки, 79), Чельстрём, Форсберг (Дурмаз, 79), Гвидетти (Берг, 85), Ибраҳимович.