Юлдузли таркибга эга бўлган Бельгия терма жамоаси ниҳоят Европа чемпионатида ўзини яхши томондан кўрсата олди. Марк Вильмотс шогирдлари гуруҳ босқичининг 2-тури доирасида Ирландия устидан йирик ҳисобда ғалаба қозонишди.

Биринчи бўлимда ирландликлар яхши ҳимояланишди ва ўз дарвозаларини голдан сақлаб қола олишди. Аммо иккинчи таймда "қизил иблислар" рақибни бутунлай таслим этишнинг уддасидан чиқди.

Иккинчи 45 дақиқалик дебютидаёқ бельгияликлар ҳисобни очишди. Қарши ҳужумда Де Брёйне майдон марказидан ўнг қанот бўйлаб икки ҳимоячидан ўтиб кетди ва Лукаку узатма берди. Ромелу жарима майдончаси ярим айланаси ичида чап оёқда ўта аниқ зарба билан дарвоза бурчагини нишонга олди.

Ўтказиб юборилган голдан кейин Ирландия ҳужумга ўтишга ҳаракат қилди. Улар буни уддалай олишмади, боз устига, қарши ҳужумда яна иккита гол ўтказиб юборишди. 61-дақиқада ўнг қанотдан етказилган узатмани Витсель 10 метрлардан бош билан дарвозага жойлаб қўйди. Орадан 9 ўтиб, ҳисоб йирик кўринишга келди. Мёнье ҳимояда тўпни эгаллаб олиб, олдинга ўтаётган Азарни тўп билан таъминлади. Эден бир ҳимоячидан қочиб кетиб жарима майдончасига кирди ва ёлғиз турган Лукакуга узатма берди. Ҳужумчи яккама-якка вазиятда дарвозани ишғол қилди.

Ушбу ғалабадан кейин Бельгия терма жамоаси 3 очко билан гуруҳда 2-ўринга чиқиб олди. Италия 6 очко билан плей-оффга чиқиб бўлди. Ирландия ва Швеция ҳисобида 1 очко бор.

Евро-2016. "Е" гуруҳи. 2-тур
БЕЛЬГИЯ - ИРЛАНДИЯ - 3:0 (0:0)
Голлар: 1:0 – 48 Лукаку, 2:0 – 61 Витцель, 3:0 – 70 Лукаку.
Бельгия – Куртуа, Алдервейрелд, Вертонген, Менье, Вермален, Витцель, Дембеле (Наингголан, 57), де Брюйне, Феррейра Карраско (Мертенс, 64), Азар, Лукаку (Бентеке, 82).
Ирландия – Рэндолф, О′Ши, Уорд, Коулмэн, Кларк, Маккарти (Макклейн, 62), Уэлан, Хулахан (Макгиди, 71), Хендрик, Брэйди, Лонг (Кин, 79).
Огоҳлантиришлар: Хендрик (42), Вермален (49).