17 июнь, жума куни Россиянинг Пермь шаҳрида "Амкар" клуби мухлисалари ўртасида ҳар йили ўтказиладиган «Мисс «Амкар» танловининг финал қисми бўлиб ўтди. Унда жамоанинг энг содиқ, энг чиройли 9 нафар мухлиса қизлари иштирок этишди.
Қизлар танлов давомида бир нечта шартларни бажаришди: рақс тушишди, қўшиқ куйлашди, нутқ сўзлашди, клуб тарихи ва фаолиятига оид турли саволларга жавоб беришди.
Якунда, ҳакамларнинг қарори билан, "Мисс «Амкар»-2016" тожи ўзбекистонлик Кристина Емельяновага насиб этди. Асли тошкентлик бўлган 22 ёшли Кристина танлов хусусида қуйидагиларни гапириб ўтди.
"Беш йил аввал Тошкентдан Пермга ўқиш учун келгандим. Иқтисод йўналиши бўйича университетни тамомладим. Шундан сўнг шу ерда қолишга қарор қилдим. Ҳозирда «Каприз» вокал лойиҳасида қўшиқчи сифатида ишлаяпман. Икки ярим йилдан бери дўстларим билан «Амкар»нинг ўйинларини стадионда кузатиб бораман. Мазкур танлов ҳақида эшитганимда, менга унда иштирок этишни таклиф қилишди. Мен рози бўлдим ва ғолиб чиқдим!", - дейди Кристина Емельянова.
Энди Кристина «Мисс РФПЛ-2016» танловида "Амкар" шарафини ҳимоя қилади.
