Англия терма жамоаси Европа чемпионатининг ярим финалига чиқа олса, Англия футбол ассоциацияси (АФА) бош мураббий Рой Хожсон билан шартномани узайтиради.
АФА раиси Грег Дайк хабарига кўра, “шерлар” Евро-2016 яримфиналига етиб боришса, Хожсон терма жамоада қолади.
«Рой билан шартнома борасида Евро-2016 тугагандан сўнг гаплашиб оламиз. Агар Англия яримфиналгача борса, албатта бу муваффақият саналади. Агар чоракфиналда яхши ўйин намойиш қилиб, кучли жамоага ютқазса ёки пенальтилар сериясида мағлуб бўлса, у ҳолда шартнома ҳақида обдон ўйлаб кўрамиз», — деди Дайк BBC 5 Live эфирида.
Эслатиб ўтамиз, Хожсоннинг АФА билан тузган шартномаси Евро-2016дан сўнг ўз ниҳоясига етади.
